An Eala Órga agus Scéalta Eile Ón India
Bailiúchán scéalta gearra ón India atá ar fáil in An Eala Órga, athinste ag Gabriel Rosenstock. Bíonn fadhb éigean le réiteach ag na hainmhithe i ngach scéal - na giorriacha, an buabhall uisce, eala, sionnach agus mac tíre san áireamh. Éiríonn le hainmhí faoi leith an lámh in uachtar a fháil ar na carachtair eile sa scéal trí sheift éirimiúil a imirt.
Ní ainmhithe amháin atá sna scéalta ach oiread ach réimse daoine ó bhean bhocht feirmeora go banphrionsa. Scéalta cliste atá le fáil sa leabhar, lán le saibhreas na teanga agus an greann fite fuaite go mór iontu ag Rosenstock. Chomh luath is a bhíonn scéal amháin léite, bíonn ríméad ar an léitheoir an chéad cheann eile a léamh. Is saothar ealaíne é an leabhar seo a bhuíochas le léaráidí áille Brian Fitzgerald, a chuireann cultúr agus traidisiún na hIndia go mór chun cinn ar gach leathanach. Baintear úsáid éifeachtach as dathanna sna léaráidí agus cruthaítear teannas sna scéalta le cabhair ón chodarsnacht idir na dathanna geala agus na dathanna dorcha sna híomhánna tarraingthe. Cheapfá ón léaráid ildaite ar an gclúdach gur leabhar é atá dírithe ar pháistí ach bhainfeadh chuile dhuine sásamh as obair an mhaisitheora agus as peann an scríbhneora. Cnuasach finscéalta traidisiúnta atá ar fáil sa leabhar seo ina dtiocfaidh an léitheoir idir óg agus aosta ar ais chucu arís is arís eile.