Katie agus an Pacáiste Rúnda
Is úrscéal taitneamhach é seo faoi chailín óg, Katie, atá go huile is go hiomlán gafa leis an mbleachtaireacht. Lá amháin, is cuairt á thabhairt ag a clann ar theach a Daideo, téann pacáiste leis ar iarraidh. In imeacht an úrscéil cuirimid aithne ar Katie agus a cairde is iad I mbun bleachtaireachta. Is cailín fiosrach í Katie agus is minic nach mbíonn mórán measa aici ar phríobháideachas na ndaoine mórthimpeall uirthi! É sin ráite, is léir gurb é an ceartas an cloch is mó ar a paidrín agus mar sin gabhaimid leithscéal léi as ucht a drochthréithe.
Tá mistéir iontach ag baint leis an úrscéal seo. Tagann athrú poirt ar an bplota i lár an scéil agus bhí sé deacair an críoch a thuar dá bharr. Sílim go mbainfeadh duine ar bith taitneamh as mar thoradh ar seo. Bheadh sé go maith tuilleadh forbartha a dhéanamh ar na mioncharachtair má fhoilsítear scéal eile le Katie. Ba charachtair shuimiúla iad Daideo Katie, a chairde agus a chomharsana agus bheadh sé deas dá mbeadh muid tar éis bualadh leo don dara uair roimh dheireadh an scéil.
Tá Gaeilge dheas shaibhir sa leabhar seo agus tá aon fhrása nó focal atá deacair le tuiscint scríofa i gcló trom agus mínithe ar chúl an leabhair. Tá sé seo fíor chabhrach agus coinníonn sé saibhreas na Gaeilge ar ardchaighdeán.
Katie’s determination to locate her Grandad’s missing package unravels an even bigger mystery for this young detective.
