Bliain na nAmhrán
Ní leor an focal ‘leabhar’ chun cur síos cuí a dhéanamh ar an bhfoilseachán seo le Tadhg Mac Dhonnagáin. Is éard atá i gceist in Bliain na nAmhrán ná bailiúchán rannta do pháistí roinnte de réir séasúir, dlúthdhiosca mar thionlacan leis an leabhar agus ceol nuachumtha air. Mar aon leis sin d’oibrigh maisitheoir amháin ar gach séasúr. Caoga leathanach atá thar a bheith gleoite atá le feiceáil mar aon le fiche amhrán binn le cloisteáil.
Is as síol beag a fhásann an crann is airde agus fásann an leabhar seo as an rann beag Síolta Beaga. Is oscailt álainn é atá ina hábhar dóchais dúinn go léir go dtiocfaimid go léir slán as an sneachta bán. Tá soineantacht agus glaine le brath i nguth álainn an pháiste a chanann an t-amhrán sin. Leanann an leabhar mar a leanann na séasúir a chéile. Na beacha, an trá, an zú agus an chuach a thugann an samhradh leo. Tagann rannta faoi dhuilleoga agus faoi fháinleoga sna sála orthu siúd, dar ndóigh. Is i lár an fhómhair atá ceann de na rannta is cliste, an ceann faoin múinteoir bocht nach bhfuil ag iarraidh dul ar ais ar scoil! Tá macalla an tseanamhráin ‘Mo Ghile Mear’ le brath ón dán ‘Tomás an tiora Rua’. Ní féidir leis an ainmhí bocht seo dul a chodladh ‘suan ná séan ní bhfuair mé féin go fóill’. Casann sé ar dhearcáin a chomhaireamh chun é féin a chur ina chodladh don gheimhreadh! Is leabhar iontach ar fad é seo, idir mhaisiúcháin, cheol, amhránaíocht agus leagan amach. An Fómhar an séasúr ab fhearr liom.
