Irish language

Sa chúigiú leabhar sa tsraith Dialann Dúradáin, leanaimid Greg Heffley arís. Ach an uair seo, scéal taobh istigh de scéal atá ann, agus tá an scéal seo scríofa ag Rowley Jefferson le moltaí cabhracha (agus moltaí nach bhfuil cabhrach ar chor ar bith) ó Greg Heffley. Buaileann muid le Rowland agus a dhlúthchara Garg. Téann said ó áit go háit i mbun eachtraíochta fíorghreannmhara chun mátháir Rowland a shábháil ón nGruagach Geal. Tá an leabhar chomh barrúil agus spraíúil sin go mbeifeá ag rachtaíl gáire!

An bhfuil tú go cinnte anseo? Sin an cheist mhór fealsúnachta a chuirtear roimh an gcailín óg ag tús an scéil, ceist a spreagann a haistear ó leathanach go leathanach. Dá bharr, téann an príomhcharachtar sa tóir ar chuid thábhachtach di: a scáil atá ar iarraidh.

Léirítear draíocht, lúcháir agus simplíocht an tsaoil i meon an pháiste sa leabhar cumasach, taitneamhach seo. Dánta le téamaí uilíocha a oireann do ghnáthshaol an pháiste.

Foilsíodh an leabhar seo ar dtús sa bhliain 1943, tráth ar chuir muintir na tíre aithne ar an mbleachtaire iomráiteach Réics Carló den chéad uair. Scéal bleachtaireachta amach is amach is ea é seo le tréithe den bhficsean eolaíochta chomh maith.

Is leabhar grafach é seo, maisithe go híontach agus lán le dathanna agus fuinneamh. Sa tsraith leabhar seo tá Asterix agus a chairde ina gcónaí sa Ghaill (sean Fhrainc) san am atá thart agus tá an scéal seo leagtha amach san aimsir stairiúil sin. Sa leabhar seo, téann Asterix agus a chara Obelix ar cuairt chuig an Róimh le coróin labhrais Chaesair a aimsiú. Ar an mbealach tarlaíonn eachtraí éagsúla don bheirt agus insítear na scéalta seo sa leabhar. Léirítear an scéal tríd na pictúirí agus trí labhairt na gcarachtar agus cabhraíonn na pictúirí go mór leis an ngreann atá le fáil sa leabhar.

Aistriúchán é seo ar ‘Your Little Sleep’. Leabhar an-fiúntach é a chuideoidh le tuismitheoirí a bhfuil páistí dá gcuid ag dul faoi ainéistéiseach ginearálta (ain-éis-téis-each). Míníonn an t-údar cad a tharlaíonn nuair a théann tú isteach in ospidéal na bpáistí le haghaidh obráide nó chun scanadh a fháil. Taispeántar cuid de na daoine agus na rudaí a fheictear san ospidéal (máinlianna agus masc ocsaigine, mar shampla).

Is úrscéal eachtraíochta do dhaoine óga é seo a thaitneoidh le léitheoirí óga atá ag lorg scéal lán de mhistéir, de bhleachtaireacht agus d’aicsean.

Seo scéal eachtrúil greannmhar ó údar Trumptaí Dumptaí agus an Falla Mór. Sciobtar Spluff Splaifeirtí óna bhaile ar an domhan agus tugtar go Marz é (is ea, Marz, le ‘z’). Tá téamaí éagsúla sa leabhar atá an-spéisiúil agus is féidir é a chíoradh ar cúpla bealach: tá an coilíneachas ann, agus ceist na teanga, mar aon le forbairtí teicneolaíochta agus an fhiosracht mar bhua an duine óig.

Clasaic mhór na Nollag ar fáil i gcló i nGaeilge den chéad uair. Leabhar gleoite amach is amach atá anseo, é maisithe go healaíonta lándaite le léaráidí Willcox Smith (ó 1912) agus clúdach láidir crua air. Níl aon chlúdach deannaigh leis, rud atá an-oiriúnach le leabhar mar é; bheinn ag súil leis go bpacáilfear suas é le cuid de na maisiúcháin Nollag le tarraingt amach ó bhliain go bliain. Níltear ag iarraidh an forchlúdach a stróiceadh!