Scéalta le hInsint don Ghealach
Cnuasach gearrscéalta, dhá cheann déag ar fad, atá sa leabhar seo. Is scéalta atá bunaithe ar scéalta traidisiúnta ón mbéaloideas iad, curtha in oiriúint do pháistí ag Caoimhe Nic Lochlainn. Tá na scéalta plódaithe le greann, tóraíocht agus gaiscíocht.
Creid é nó ná creid, ach fadó fadó, ní raibh tae le fáil go forleathan in Éirinn. Buail isteach ar an tseanbhean a tháinig ar an tae den chéad uair. Conas a d’ullmhaigh sí an tae agus céard a bhí le rá ag an seanfhear faoi? Scéal anghreannmhar é seo. Tá meascán maith idir scéalta fantaisíochta agus stairiúla sa leabhar. Tá cosúlacht idir cuid de na scéalta agus na scéalta traidisiúnta, ‘Seán agus an gas pónaire’ ‘Bhí seanbhean ann a shlog cuileog’ agus ‘Luaithríona’, ach ag an am céanna tá difríocht mhór eatarthu. Tá an leagan amach neamhchoitianta le gluais chun tosaigh agus ar chúl an leabhair. Tá an líníocht go maith, d’fhéadfadh na dathanna a bheith beagáinín níos láidre. De ghnáth is iad na dathanna a mheallann páistí chuig an leabhar. Tá an Ghaeilge sách deacair, mar sin ní bheadh páistí gan sárlíofacht na Gaeilge ábalta an leabhar a léamh leo féin. Ar ndóigh is féidir an leabhar a léamh do pháistí agus bainfidh siad sult iontach as na scéalta.
