Na Trí Mhuicín
‘Sean scéal agus meirg air’ a chloisim tú ag rá nuair a léann tú teideal an leabhair seo. Agus, ar dhóigheanna áirithe tá an ceart agat mar is annamh nach mbíonn eachtraí dána an mhic tíre ar eolas ag léitheoirí. Ach sa chás seo ní bheadh an ceart agat. Fiú má tá an bunscéal ar eolas agat, tá saothar ealaíne úr cruthaithe ag an údar agus an maisitheoir atá chomh bríomhar agus ildaite leis an chéad tuar ceatha i ndiaidh geimhridh fhada.
Is beag an spás atá curtha amú ag Paddy Donnelly ar leathanaigh líonta le dath. Is spraíúil iad na muca agus is scanrúil é an mac tíre atá léirithe aige. Beidh léitheoirí óga ag béicíl ar na muicíní mar cé go n-insíonn na focail agus na léaráidí sa chúlra go bhfuil na bainbh i gcontúirt ag tús an scéil taispeántar iad aineolach ar an dainséar seo ar leac an dorais. Baineann an maisitheoir úsáid chliste as peirspictíocht mar fásann an neach bagrach agus a fhiacla géara go dtí go líontar an leathanach uilig lena mheangadh glic.
Ach tá seans láidir ann an chéad uair a léann tú an leabhar seo nach mbeidh an t-am agat díriú isteach i gceart ar na léaráidí mealltacha mar beidh tú scuabtha ar aghaidh ar shruth na filíochta ina bhfuil na heachtraí inste. Tá an rím agus an rithim atá cruthaithe ag an iar-Laureate tógálach agus beidh fonn ort an scéal a léamh arís agus arís eile. Is fóirsteanach atá réiteach an scéil do léitheoirí óga. Clasaic úr do leabhragáin teaghlaigh.
