Bearradh Gruaige d'Eoinín
Is minic a bhíonn drogall ar pháistí óga bearradh gruaige a fháil. Agus cén fáth nach mbeadh? Siosúr géar, trup millteanach ón triomadóir agus strainséir ag cur isteach ort le horduithe. Ach leis an leabhar beag gleoite seo, beidh tachráin ábalta cuairt a thabhairt ar an ghruagaire roimh ré in éineacht le mamaí nó daidí agus uainín cróga lomrach!
Seo mír eile sa tsraith spraíúil de leabhair chairtchláir a thugann cuireadh don léitheoir óg cuidiú a thabhairt do laoch an scéil. Cuirtear ceist ort greim a bhreith ar lámh Eoinín nuair atá buairt air agus faigheann tú deis cnaipe an triomadóra a bhrú. Is sásta an chaora óg atá ann ag an deireadh mar gheall ar an chúnamh a fhaigheann sé ón léitheoir agus an ghruagaire cairdiúil. Rud a chuirfeadh tuismitheoir nó páiste ar a shuaimhneas roimh bhearradh gruaige.
Le cúlra suaimhneach gorm, is fóirsteanach a bheadh an leabhar seo mar scéal roimh am luí. Tá a lán le léamh ar aghaidh Eoinín agus is éasca a bheidh sé do léitheoir óg na mothúcháin seo a thuiscint sna léaráidí bríomhara. Tá na leathanaigh breactha le sonraí beaga suimiúla fosta– is greannmhar an radharc de héin ag tógáil neide in olann thiubh na caorach!
Is iontach an áis iad na leabhair chairtchláir ardchaighdeáin Ghaeilge seo do thuismitheoirí agus mhúinteoirí luath-óige. Ba mhaith linn tuilleadh leabhar cosúil leis seo le bhur dtoil!
