Ní leor an focal ‘leabhar’ chun cur síos cuí a dhéanamh ar an bhfoilseachán seo le Tadhg Mac Dhonnagáin. Is éard atá i gceist in Bliain na nAmhrán ná bailiúchán rannta do pháistí roinnte de réir séasúir, dlúthdhiosca mar thionlacan leis an leabhar agus ceol nuachumtha air. Mar aon leis sin d’oibrigh maisitheoir amháin ar gach séasúr. Caoga leathanach atá thar a bheith gleoite atá le feiceáil mar aon le fiche amhrán binn le cloisteáil.
Tá chuile dhuine de mhuintir Aoife gafa leis an stair – chuile dhuine seachas Aoife! Ní thuigeann sí cén fáth a chaitheann a máthair lá i ndiaidh lae ag toraíocht taisce sa tseanmhainistir. Ach nuair a thosaíonn buachaillí óna rang scoile ag spochadh as a máthair as a bheith ag ‘lorg taibhsí’, tugann Aoife féin cuairt ar an mainistir i lár na hoíche.
Nuair a smaoiním ar na leabhair a mholaim do sheilf an tuismitheora nua, ritheann na teidil chlasaiceacha ar nós Guess How Much I Love You agus Oh the Places You’ll Go liom. Ach tá moladh nua anois agam agus sin saothar álainn Oliver Jeffers, Anseo Atá Muid.
Seo an tríú leabhar sa tsraith álainn faoi Choinín Beag. Leabhair idirghníomhacha atá iontu, ina gcabhraíonn an léitheoir
óg le Coinín Beag lena ghnáthimeachtaí laethúla. Sa leabhar seo, tá sé in am folctha ag Coinín Beag, agus iarrtar ar an bpáiste glaoch ar an gcoinín, braoinín seampú a chur ar a cheann, séideadh ar a chluasa chun iad a thriomú, agus a leithéid.
Is sraith álainn iad na leabhair seo faoi choinín gleoite chun tús a chur le scéalaíocht le leanaí an-óg. Nuair nach bhfuil léamh ná caint ag páiste go fóill, bíonn dúshlán ann don té atá ag léamh dóibh chun a n-aird a choimeád ar an leabhar. Bíonn an léitheoir fásta ar a dhícheall go minic chun an páiste a tharraingt isteach sa scéal pé slí gur féidir leo (le geáitsíocht nó glórtha aite go minic!).
Ba bhreá le Greg Heffley a shamhradh a chaitheamh os comhair scáileáin ach níl a mhamaí sásta. Tá samhradh iomlán éagsúil beartaithe aici dó. An mbeidh an bua ag mamaí nó ag Greg? Tá pictiúir áille ar gach leathanach den leabhar a chabhraíonn go mór leis an údar beocht agus greann a chruthú.
Ó céadeisíodh Gugalaí Gug sa bhliain 2005, tá páistí na tíre ag spalpadh rannta Gaeilge agus ag dul i dtaithí ar rithim agus cheol na Gaeilge. Os cionn deich mbliana ina dhiaidh sin, agus eagrán nua den chnuasach curtha ar fáil do pháistí an 21ú haois, níor maolaíodh ar an gcíocras cainte agus canta. Díríonn an cnuasach seo isteach ar rannta traidisiúnta Chonamara a bailíodh ó mhuintir na háite, rannta a bhí ar bhéal na sleachta romhainn ach a gcuirfidh glúin óg an lae inniu spéis iontu.
Sa scéilín álainn seo tá Zog an dragún ag obair go dícheallach ar scoil chun réalta óir a fháil. Bainfidh páistí taitneamh as an sár iarracht a dhéanann Zog chun a bheith an buachaill is fearr ar scoil agus é ag foghlaim conas béiceadh i gceart agus conas tine a shéideadh.
Leabhar flapaí lán go béal le maisithe áille le Kary atá sa saothar seo Babaí Cathal: Lá Nua! scríofa ag Anne Paradis agus aistrithe go Gaeilge ag an scríbhneoir mór le rá Tadhg Mac Dhonnagháin. Cuirtear síos ar imeachtaí na maidine a bhíonn ag Cathal, buachaill óg, a réitíonn é féin don lá amach roimhe.
An Fathach Is Breátha sa Tír – ar léigh tú i gceart é? Nach créatúr déitsineach scanrúil é an fathach? Nuair a bhuailtear le Seoirse, an fathach breátha, ag tús an scéil, tá sé gléasta in éadach gioblach. Ceannaíonn sé culaith nua agus tá cuma an-snasta anois air. Ní fhada a bhfuil an cruth galánta sin air go dtí go mbuaileann an fathach le cairde a bhfuil gá níos deimhne acu don éadaí. Ar mhaithe le na hainmhí eile, ligeann Seoirse uaidh a chuid éadaí, ach cibé éadaí a chaitheann sé is léir gurb é fós an fathach is breátha sa tír – an áilleacht atá sa chroí.
